Бугун, 27 октябр куни Президент Шавкат Мирзиёев геология ишларини кенгайтириш, фойдали қазилмаларнинг конларини аниқлаш ва ўзлаштириш режаларига бағишланган тақдимот билан танишди. Бу ҳақда Президент матбуот хизмати хабар берди.

Унда саноатни ривожлантириш бўйича қўйилган марраларга эришишда иқтисодиётни минерал ресурслар билан таъминлаш муҳим аҳамиятга эгалиги айтиб ўтилган. Кейинги йилларда Ўзбекистонда геология соҳасини трансформация қилиш доирасида унинг моддий-техник базаси мустаҳкамлангани, илмий изланишлар ва кадрлар тайёрлаш кучайтирилгани алоҳида таъкидланган.

Шунингдек, тақдимотда соҳада қилинган ишлар, фойдали қазилмаларни аниқлаш ва ўзлаштиришга хорижий ҳамкор ва инвесторларни жалб қилиш режалари кўриб чиқилган.

Маълумот учун, геология-қидирув ишлари олдинги даврга нисбатан 3 баробар ошди. 3D сейсморазведка, аерогеофизика, космогеология, рақамли геология каби илғор усулларни жорий этиш бошланди. Геология фанлари университети ташкил этилиб, ҳозирги кунда 1,5 минг нафар ёшлар замонавий билим ва кўникмаларни эгалламоқда. Конларни излаш ва ўзлаштириш билан шуғулланаётган тадбиркорлар сони 4 баробарга ошди.

Шу йилнинг ўзида геология ишларига 180 миллион доллар хорижий инвестициялар киритилди, амалга оширилаётган лойиҳаларнинг умумий қиймати эса 2 миллиард доллардан ошди.

Эслатиб ўтамиз, аввалроқ «Ўзбекнефтгаз» саккизта конда геология-қидирув ишлари тугатилиб, захиралар ҳисобланаётганини маълум қилганди.