Bugun.uz‘даги мавжуд маълумотларга кўра, Тошкент вилоятининг Қуйичирчиқ туманида 62 ёшли ногиронлиги бўлган аёл тўрт нафар фарзандидан алимент ундириш учун судга мурожаат қилган.

Маълум бўлишича, аёлнинг фарзандларидан ҳеч бири у билан бирга яшамайди, эри эса вафот этган. Икки фарзанди алимент тўлаган, аммо бошқа иккитаси (ака ва сингил) бундан бош тортган.

Алимент миқдори 815 минг сўмни ташкил этади. Аёлнинг айтишича, фарзандларининг бу пулни тўлашга қурби етади.

Фуқаролик ишлари бўйича Қуйичирчиқ туманлараро судининг 2023 йил 23 октябрдаги ҳал қилув қарори билан қарздорлар Д.У. ва Б.В. Маъмурий жавобгарлик тўғрисидаги кодекснинг 47-5-моддасига асосан 15 суткалик қамоқ жазосини олган. Мажбурий ижро бюроси билдиришича, агар фарзандлар суд томонидан белгиланган тартибда алимент тўламаса, уларга нисбатан жиноят иши қўзғатилади.

Эслатиб ўтамиз, аввалроқ Қўқонда аёл сарпосини қайтариб беришдан бош тортган эрини судга бергани хабар қилинганди.