2023 йилнинг 29 декабр куни «Ўзбекистон Республикаси давлат божхона хизмати органларининг шахсий таркиби ҳамда уларнинг оила аъзоларини ижтимоий ҳимоя қилиш тизимини тартибга солиш тўғрисида»ги Вазирлар Маҳкамаси қарори қабул қилинди. Ҳужжат эълон қилинган кундан эътиборан кучга кирган.

Қарорга кўра, ватанни ва халқнинг тинч ҳаётини ҳимоя қилиш учун ҳалок бўлган ходимнинг оила аъзоларига ходимнинг охирги эгаллаб турган лавозим маоши ва махсус унвони маоши бўйича иш ҳақининг 150 баравари миқдорида нафақа тўланади.

Хизмат мажбуриятларини бажариш чоғида ҳалок бўлган ходимнинг оила аъзоларига – 100 баравар миқдорда.

Тан жароҳати олинганда ходимга қуйидаги миқдорларда нафақа тўланади:

• оғир тан жароҳати олинганда – лавозим маоши бўйича 50 баравари миқдорида;
  ўртача оғир тан жароҳати олганда – 20 баравари миқдорида.

Маълумот учун, божхона органларининг хизматдаги офицерлари ва сержантлар таркиби ходимларининг фарзандларига ўқишга кириш учун:

• давлат олий таълим муассасалари бакалавриатига ажратилган умумий давлат гранти асосидаги қабул параметрларига нисбатан бакалавриат таълим йўналишларининг кундузги таълим шаклига алоҳида икки фоизли давлат гранти асосидаги квоталар;
• олий ҳарбий ва ҳарбийлаштирилган таълим муассасаларига белгиланган умумий қабул параметрлари доирасида икки фоизли давлат гранти асосидаги квоталар ажратилади.

Шундай қилиб, тавсиянома бир давлат олий таълим муассасаси ҳамда олий ҳарбий ва ҳарбийлаштирилган таълим муассасасига бир марта кириш учун уч йилдан ошмайдиган муддатга берилади.

Қоидалар қарор билан тасдиқланган қуйидаги низомларда мустаҳкамлаб қўйилган:

• Давлат божхона хизмати органларининг хизмат мажбуриятларини бажариш чоғида тан жароҳати олган ходимларига, шунингдек ҳалок бўлган ходимлар оилаларига бир марталик нафақа тайинлаш ва тўлаш тартиби тўғрисида;
  Давлат божхона хизмати органи ходимининг ёки унинг яқин қариндошларининг мол-мулкига хизмат мажбуриятларини бажариши билан боғлиқ ҳолда етказилган зарарнинг ўрнини қоплаш тартиби тўғрисида;
  Давлат божхона хизмати органи ходимларининг фарзандларига давлат олий таълим муассасалари ҳамда олий ҳарбий ва ҳарбийлаштирилган таълим муассасаларига ўқишга кириш учун тавсияномалар бериш тартиби тўғрисида;
  Давлат божхона хизмати органи ходимларига уй-жой ижараси учун ҳар ойлик пулли компенсация тўлаш тартиби тўғрисида.

Эслатиб ўтамиз, аввалроқ, Божхона қўмитасининг бошқарма бошлиғи ўринбосари ҳибсга олинганди. Bugun.uz маълумотларига кўра, у айрим тадбиркорларга суғурта кафолатлари асосида божхона тўловларини кечиктириб тўлашга шароит яратиб берган. Шунингдек, Божхона қўмитаси раисига пиротехника воситалари кўпайиб кетгани бўйича сенатор сўрови юборилгани ҳақда хабар берилганди.