Пентагоннинг ҳисоблашича, Украина армияси яқин вақтлар ичида Қримни қайтариб ололмайди, мамлакат қуролли кучлари бундай ҳаракатларни амалга ошириш имкониятини ҳали-бери қўлга киритмайди. Бу ҳақда идоранинг тўрт нафар юқори мартабали амалдори Вакиллар палатасида ўтказилган махфий брифингда маълум қилди, деб хабар беради Politico.

Нашрнинг яна бир манбасига кўра, бундай операция ўтказилгудек бўлса, Украинанинг ғалабаси кафолатланмаган. Пентагон махфий брифинг ва унда илгари сурилган фикрларга изоҳ беришдан бош тортган. Идора вакили Сабрина Сингхнинг таъкидлашича, «Украинанинг курашиш ва суверен ҳудудни қайтариб олиш нуқтаи назаридан бу ажойиб натижа… ва жанг майдонида мунтазам мослашувчанлик ўзи бундан далолат беради».

Politico’нинг келтиришича, ҳисобот берганлар орасида Операциялар бўйича бирлашган штаб директори генерал-лейтенант Дуглас Симс ва мудофаа вазирининг Россия, украина ва Евроосиё бўйича ёрдамчисининг ўринбосари Лора Купер ҳам бўлган.

Зеленский ҳукумати Украина ҳарбий йўл билан 1991 йилги чегараларни қайтариб олишига Пентагон шубҳага бораётганидан «дарғазаб бўлганди». Киевнинг таъкидлашича, Америка развдкаси Украина Қуролли Кучларининг имкониятлари борасида олдин ҳам хато қилган. АҚШ Штаб бошлиқлари бирлашган қўмитаси раиси генерал Марк Милли январь охирида шу каби баҳони берганди. У 2023 йилда Украина армиясига 1991 йилги чегараларга қайтиш «ҳарбий йўл билан жуда ва жуда қийин эканини» маълум қилган.

Қрим 2014 йилда референдум натижалари бўйича Россия таркибига қўшилганди. Украина ҳукумати ва Ғарб давлатлари ушбу овоз бериш жараёнларини тан олмаган ва содир бўлаган воқеани аннексия деб ҳисоблаган. Россия президенти Владимир Путин яриморол аҳолиси ўз танловини амалга оширган ва Қримнинг тарихан қаерга тегишли экани тўғрисидаги масала ёпилганини маълум қилганди.