Украина президенти Владимир Зеленский Politico нашри версияси бўйича 2022 йилда Европадаги энг нуфузли инсон деб топилди.

«Европа етакчиси ҳозирда машҳурликка эришган яшил зайтун рангли футболкадаги 44 ёшли эркак билан суратга тушиш учун Киевга чопаётганини қаранглар. Унинг ёнида бўлиш орқали сиёсатчилар ўзларини эътиборга тушган деб ҳисобламоқда. Зеленский бутун Европани унинг келажаги Украинага боғлиқлигига ишонтирди — Россиянинг февралда бошланган босқинига қадар бунга кўпчилик ишонмас эди», — дейилади Зеленскийга бағишланган мақолада.

Politico учун ёзган мурожаатида Украина президенти ўз мустақиллиги учун курашаётган мамлакатнинг барча фуқароларига, шунингдек, «барқарорликни қўллаб-қувватлашга ёрдам берадиган Европадаги барча дўстларига» миннатдорчилик билдирди. «Ишонаманки, украинлар кейинги йилда энг кучли таъсир доирага эга инсонларга айланади, бироқ бу вақтда тинчлик ҳукм суради», — дея қўшимча қилган Зеленский.

Нашр энг Европанинг 2022 йилдаги энг нуфузли инсонлари рейтингига жами 28 нафар сиёсатчини киритган. Улар орасида Россия президенти Владимир Путин ҳам мавжуд бўлиб, нашр уни «йил омадсизи» деб атаган.

«Владимир Путиннинг буюк Россия ҳақидаги орзуси амалга ошмайдиган кўринади. Унинг Украинага кенг кўламли босқини қандай бошланган бўлса, шундай тезликда парчаланишни бошлади… Бу Россияни паст баҳо берган ва нафратланган рақибни мағлуб эта олмаган учинчи даражали давлатга айлантирди. Путиннинг ўжарлиги уруш чўзилишини англатади… Путин ўз орзусини амалга ошира олмагани, у ўз қўшниларига бошқа муаммо туғдирмаслигини англатмайди», — деб ёзади Politico муаллифлари.

Аввалроқ The Time журнали Владимир Зеленскийни «Йил одами» деб эълон қилганди. Журнал 1927 йилдан бери «Йил одами» унвонига сазовор бўлган кишиларни эълон қилиб келади. 2021 йилда миллиардер Илон Маск шундай номга лойиқ кўрилган. Financial Times ҳам Зеленскийни «йил одами» деб эълон қилганди.