Қашқадарё вилояти Чироқчи туманида Қизил китобга киритилган Тяншан қўнғир айиғи отиб ўлдирилгани ҳолати юзасидан Жиноят кодексининг 202-моддаси (ҳайвонот ёки ўсимлик дунёсидан фойдаланиш тартибини бузиш) 3-қисми «ж» банди билан жиноят иши қўзғатилди.

Бош прокуратура матбуот хизматининг хабар беришича, ҳозирда тергов ҳаракатлари олиб борилмоқда.

Эслатиб ўтамиз, Қашқадарё вилояти, Чироқчи тумани, «Яшнобод» маҳалласи ҳудудига 2023 йилнинг 5 апрел куни Қизил китобга киритилган қўнғир айиқ тушиб келиб, Қумдарёга яқин жойдаги жарликда ҳосил бўлган ғор ичига кириб олгани хабар қилинганди.

Маҳаллий ҳокимлик вакилларидан иборат ишчи гуруҳ томонидан ўз вақтида тегишли чора-тадбирлар кўрилмагани боис айиқ безовталаниб, жарликдан тепага чиқишга уринган. Чироқчи тумани ИИБ бошлиғи А.Б. атрофга йиғилган аҳоли хавфсизлигини таъминлаш мақсадида овчи Д.А.га айиққа ўқ узишга кўрсатма берган. Оқибатда айиқнинг жони узилган.