Қишлоқ хўжалиги вазирлиги ижтимоий тармоқларда Қозоғистоннинг 24KZ телеканалига асосланган ҳолда «Огоҳ бўлинг: Ўзбекистон помидорларида хавфли вирус аниқланди» сарлавҳаси остида тарқалган хабарларга муносабат билдирди.

Маълум қилинишича, Ўсимликлар карантини ва ҳимояси агентлиги томонидан ҳолатга аниқлик киритиш мақсадида олиб борилган дастлабки тезкор суриштирув ва ўрганишлар натижаларига кўра Қозоғистон томони Ўзбекистондан импорт бўлган помидор маҳсулотларида помидор жигарранг вируси (tomato brown rugose fruit virus) ва бошқа карантин касалликлар аниқлангани юзасидан маҳсулотларни орқага қайтариш ҳолати кузатилмаган ва эътирознома (нотификация) жўнатмаган.

Шу билан биргаликда, Ўзбекистон ва Қозоғистон карантин хизматлари билан тезкор равишда музокара олиб борилиб, ушбу тарқалган хабарга изоҳ берган фитосанитария хизматининг Туркистон вилояти ҳудудий инспекцияси раҳбари И.Бегасилов помидор жигарранг вируси аниқланиш ҳолати юзасидан импорт бўлган 43 тонна помидор маҳсулотида, айнан Ўзбекистондан юкланган помидор маҳсулотида хавфли вирус қайд этилмаганини телефон мулоқотида тасдиқлади.

Вазирликка кўра, Ўзбекистондан помидор экспорти бўйича агентлик томонидан 2023 йил ўтган давр мобайнида импортер давлатларнинг фитосанитария талабларига мувофиқ жами 24 147 тонна (шундан 14 424 Қозоғистонга экспорт учун) помидор маҳсулотига халқаро фитосанитария сертификати берилган ва импортер давлатларнинг карантин хизмати томонидан номувофиқлик ҳолатлари аниқланганлик юзасидан эътироз ҳолати қайд этилмаган.

«Жаҳон бозорига хавфсиз, текширилган ва турли касалликлардан ҳоли маҳсулотларни чиқариш, халқаро қишлоқ хўжалиги майдонида Ўзбекистон бренди нуфузини мустаҳкамлаш мақсадида ҳар бир қишлоқ хўжалиги маҳсулоти партиясидан намуналар олиниб, Марказий фитосанитария лабораториясида экспертизадан ўтказилиб, лабораториянинг хулосасига кўра экспорт ва импорт жараёнлари амалга оширилади. Жумладан, помидор жигарранг вирусини аниқлаш учун ҳам намуналар 8 соат давомида махсус полимераза занжир реакцияси (ПЗР) тестидан ўтказилади», дейилади хабарда.