Тожикистондаги Россия ҳарбий базаси Афғонистондаги вазиятнинг кескинлашуви фонида янги қурол билан таъминланди. Бу ҳақда «Интерфакс» хабар берди.

Маълум қилинишича, ҳарбий базага «Верба» кўчма зенит-ракета комплекслари, «Калашников» АК-12 автоматлари, замонавий снайпер милтиқлар ва олов пурковчи қуроллар олиб келинган.

«201-ҳарбий базага энг янги Калашников АК-12 автоматлари, Макаров тўппончалари ўрнини босадиган Яригин тўппончалари, замонавий катта калибрли АСВК-М снайпер милтиқлари, узоқ масофали олов пурковчи қуроллар ва бошқа техникалар топширилди», дейилади хабарда.

Қайд этилишича, бу қуролларнинг барчаси Россия бўлинмалари томонидан Афғонистондаги вазиятнинг беқарорлашуви фонида ўтказилган Тожикистон ва Ўзбекистон билан қўшма машғулотлар пайтида ишлатилган.

Аввалроқ Шойгу ШҲТга аъзо давлатлар янги хавфга дуч келишини айтганди. Шунингдек, Россия мудофаа вазири Афғонистонда ҳарбий ҳаракатлар авж олишига нима сабаб бўлганини маълум қилган.