Самарқанд вилоятида маст ҳолатда бўлган эркак қурилиш объектининг қоровулини ўлдириб қўйди.

Маълум қилинишича, 2023 йилнинг июл ойида вилоятнинг Самарқанд туманида жойлашган қурилиш объектида қоровул бўлиб ишлаб келган эркакнинг олдига 35 яшар яна битта эркак келиб, у билан биргаликда спиртли ичимлик истеъмол қилган. Натижада, улар ўртасида жанжал юзага келган ва маст ҳолатдаги ёш йигит қоровулни калтаклаб, ўлдириб қўйган ва воқеа жойидан ғойиб бўлган.

15 июл куни эса қурилиш объектида қонга беланиб ётган эркакнинг жасади топилган. Жасадни шу ерда ўйнаб юрган болалар кўриб қолган ва бу ҳақда ички ишлар органларига хабар берган. Аниқланишича, марҳум воқеа содир бўлган жойда уч кун давомида ётган.

Ҳолат юзасидан бўлиб ўтган судда Жиноят кодексининг 97-моддаси (қасддан одам ўлдириш) билан айбланувчига 15 йил муддатга озодликдан маҳрум қилиш жазоси тайинланди.

Аввалроқ, Тошкентда Қурбон ҳайитини спиртли ичимлик ичиб нишонлаган эркак шеригини ўлдириб қўйгани ҳақда хабар берилганди.