Ўзбекистон Президенти Шавкат Мирзиёев Озарбайжон Республикаси президенти Илҳом Алиевнинг таклифига кўра 22-23 август кунлари давлат ташрифи билан Озарбайжонда бўлади.

Президент матбуот хизматининг хабар беришича, ташриф доирасида икки давлат раҳбари ўртасида музокаралар ҳамда тадбирлар ўтказилиши режалаштирилган. Шу билан бирга, Ўзбекистон — Озарбайжон стратегик шериклик муносабатларини янада мустаҳкамлаш ва амалий ҳамкорликни кенгайтириш масалалари ҳам кўриб чиқилади.

Бундан аввал шу йилнинг 2 март санасида Шавкат Мирзиёев Бокудаги энг йирик халқаро тузилмалардан бири — Қўшилмаслик ҳаракати саммитининг ялпи сессиясида иштирок этиб, тадбир давомида нутқ сўзлаган эди.

«Қўшилмаслик ҳаракатининг БМТ Хавфсизлик кенгашида доимий ўрни бўлиши керак» — Шавкат Мирзиёев.

Ўтган йилнинг 15 сентябр куни Озарбайжон президенти Ўзбекистонга ташриф буюриб, ШҲТ тадбирида меҳмон сифатида иштирок этган. Ташриф давомида Илҳом Алиев Самарқанд шаҳрига ҳам келган ва биринчи президент Ислом Каримов қабрини зиёрат қилган.

Озарбайжон президенти ўтган йилнинг июн ойида ҳам ватанимизга ташриф буюрган эди. Президент ташрифи Тошкент шаҳридаги Ҳайдар Алиев хотирасига бағишланган монументнинг очилиш маросими билан бошланган. Ташриф давомида икки давлат ўртасидаги стратегик шерикликни чуқурлаштириш масалалари тўғрисида декларация ҳам имзоланган.

Маълумот ўрнида, Ҳайдар Алиев ( 1923 – 2003 ) — Озарбайжон давлат арбоби, Озарбайжон Республикасининг учинчи Президенти (1993—2003). «Улуғ раҳнамо» ва «Озарбайжон халқининг умуммиллий лидери» унвонларининг расмий соҳиби. Ҳозирги президент Илҳом Алиевнинг отаси.