Сирдарёда Табиат ресурслари вазирлигининг вилоят бошқармаси, Ички ишлар вазирлиги ва Миллий гвардия органлари ҳамкорлигида 30 март–1 апрел кунлари назорат рейд тадбирлари ўтказилди.

Маълум қилинишича, 30–31 март кунлари ўтказилган тадбирда Сирдарё вилояти, Сардоба туманидаги «Сардоба» сув омборида 2 нафар фуқаронинг ноқонуний равишда балиқ овлагани маълум бўлди. Аниқланишича, 30 март куни тунги соат 23:00 дан 31 март куни тунги соат 03:00 га қадар тақиқланган балиқ тутиш қуроллари ёрдамида 3 турдаги 242 дона балиқ овланган.

Ҳуқуқбузарлардан 1 дона резина қайиқ, 1 дона аккумулятор, 1 дона электр қармоқ ҳамда 1 жуфт эшкак далилий ашё сифатида вақтинча сақлаш учун олиб қўйилди. Шунингдек, ҳуқуқбузарларга нисбатан ҳайвонот дунёсига етказилган 196 миллион 380 минг сўм зарар миқдори белгиланди.

1 апрел куни ўтказилган рейд давомида эса соат 07:30 дан 10:30 га қадар «Сардоба» сув омборида 4 нафар фуқаро тақиқланган балиқ тутиш қуроллари ёрдамида жами 6 турдаги 288 дона балиқни ноқонуний овлагани аниқланди. Ҳуқуқбузарлардан 2 дона алюмин қайиқ, 2 дона бензинли двигатель ва 500 метр лескали тўрлар далилий ашё сифатида вақтинча сақлаш учун олиб қўйилди. Шунингдек, ҳуқуқбузарларга нисбатан ҳайвонот дунёсига етказилган 83 миллион 670 минг сўм зарар миқдори белгиланди.

Юқорида қайд этилган ҳолатлар юзасидан қонунда белгиланган тартибда чора кўриш мақсадида прокуратура органига тақдим этиш учун ҳужжатлар расмийлаштирилди.

Аввалроқ Фарғона вилоятида профилактика инспектори пора сифатида балиқ олаётгани айтилган хабарлар тарқалганди. Шуниннгдек, Қашқадарёда «Қизил китоб»га киритилган балиқлар овлангани хабар қилинганди.