Сурхондарё вилоятининг Термиз шаҳрида ва Бухоро вилояти Когон туманида пул эвазига фуқароларга ҳайдовчилик гувоҳномасини олиб беришни ваъда қилган шахслар қўлга олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Маълум бўлишича, Бош прокуратура ҳузуридаги Департамент ҳамда ДХХнинг Когон тумани бўлимлари томонидан ўтказилган тезкор тадбирда фуқаро Б.И. фуқаро М.М.ни вилоят Йўл ҳаракати хавсизлиги бош бошқармасида ишловчи танишлари орқали ҳайдовчилик гувоҳномаси олиш учун бўлиб ўтадиган имтиҳондан ўтказиб қўйишни ваъда қилган. У бунинг эвазига 750 АҚШ долларини олаётган пайтда ушланган.

Шунингдек, Термиз шаҳрида фуқаро Ш.А. ҳам фуқаро Х.Ж. га танишлари ёрдамида «С» тоифали ҳайдовчилик гувоҳномаси олиб беришни ваъда қилган. Тезкор тадбир давомида у 4,7 миллион сўмни олаётган вақтида ушланган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилаётгани маълум қилинган.

Эслатиб ўтамиз, аввалроқ Фарғонада «права» олиб беришни ваъда қилган МЧЖ раҳбари қўлга олинганди.