Сурхондарёда темир йўл кесишмасидан ўтаётган Nexia’ни поезд уриб кетди — фото
Ҳушсиз ҳайдовчи газ сизиб чиқаётган машина ичидан олиб чиқилган.
Сурхондарё вилоятида темир йўл кесишмасидан ўтаётган Nexia автомобилини поезд уриб кетди. Бу ҳақда Ички ишлар вазирлиги Транспорт ва туризм объектларида хавфсизликни таъминлаш департаменти матбуот хизмати хабар берди.
Қайд этилишича, 2023 йилнинг 17 сентябр куни 1981 йилда туғилган А.Ў. ўзига тегишли Nexia автомобилида «Зартепа-Сурхон» темир йўл бекатлари орқалиғида жойлашган қўриқланмайдиган темир йўл кесишмасидан ўтаётган пайтида 6379-сонли шаҳарлараро қатновчи Сариосиё-Термиз йўналишидаги йўловчи поезди уриб кетган. Ҳодиса оқибатида автомобил техник шикастланиб, ундан метан гази сизиб чиқа бошлаган. Сариосиё-Термиз йўловчи поездига хизматга жалб қилинган ЙПКБ 2-гуруҳ сафдор ходими сержант Ғайрат Шухратович Саъдуллаев газ чиқаётган автомобил ичидан ҳушсиз ҳайдовчини олиб чиқиб, шифохонага олиб борган.
Эслатиб ўтамиз, аввалроқ Сурхондарёда темир йўлга чиққан «Жигули»ни поезд босиб кетганди.
