Қозоғистон президенти Қосим-Жўмарт Тўқаев Жанубий Африкадан тарқалаётган коронавируснинг янги — «омикрон» штамини глобал таҳдид деб атади. Бу ҳақда «Tengrinews» хабар берди.

Маълум қиинишича, президент ЖССТга аъзо барча давлатлар ва соғлиқни сақлаш тизимлари жиддий инқирозга дуч келишда давом этаётганини айтган. У дунё бўйлаб тез тарқала бошлаган коронавируснинг «омикрон» турини янги глобал таҳдид деб номлаган. Давлат раҳбари биринчи навбатда, мамлакатларни вирусга қарши ҳимоясиз ҳолга келтирган қонуниятларни аниқлаш муҳимлигини қайд этган. У фавқулодда вазиятларга тайёргарлик бўйича конвенция ёки ЖССТнинг халқаро ҳужжатини тузиш ташаббусини қўллаб-қувватлаган.

«Ҳозирги пандемия фақат соғлиқни сақлаш соҳасидаги фавқулодда ҳолатни англатмайди. Бу глобал даражадаги тенгсизликни ҳам очиб берди. Шунинг учун Қозоғистон вакциналардан тенг ҳуқуқли фойдаланишни таъминлашга ҳисса қўшади. Ўз навбатида, биз QazVac вакцинасини ишлаб чиқдик. Ундан нафақат мамлакатимизда, балки Марказий Осиёда ҳам фойдаланиш имкониятини таъминлаймиз», — дея қўшимча қилди Тўқаев.

Аввалроқ коронавируснинг «омикрон» штамидан қандай ҳимояланиш мумкинлиги маълум бўлганди. Шунингдек, африкалик шифокор «омикрон» штамининг аломатларини хабар қилганди.