Қозоғистонда бошқарув шакли ўзгариши керак, парламент кўпроқ ваколатларга эга бўлади. Бу ҳақда республика президенти Қосим-Жўмарт Тўқаев хабар берди.

Маълум қилинишича, Тўқаев парламентнинг қўшма мажлисида бу бўйича халққа мурожаат қилган.

«Қозоғистон тараққиётининг сиёсий моделини қайта қуриш бўйича пухта ўйланган қадамлар керак. Гап биринчи навбатда супер-президентлик бошқарув шаклидан кучли парламентга эга президентлик республикасига ўтиш ҳақида бормоқда. Бундай тизим ҳокимият институтларининг оптимал мувозанатини таъминлайди ва мамлакатнинг барқарор ривожланишига хизмат қилади», — деган Тўқаев.

Шунингдек, Қозоғистон президенти депутатлар сони камайиши, Сенатдаги президентлик квотаси, парламентда Халқ ассамблеясидан келадиган квоталар қисқартирилишини қайд этган. Қонунлар қабул қилиш ҳуқуқига фақат парламент мажилиси эга бўлади. Сенат эса қабул қилинган қонунларни маъқуллайди ёки рад этади.

«Парламент қуйи палатаси ҳеч кимга сунъий имтиёзлар бермасдан, мамлакатнинг бутун сайлов манзарасини акс эттириши керак. Шу тариқа, биз парламентдаги Халқ ассамблеяси квотасини бекор қиламиз, менимча, бу ҳам сиёсий, ҳам ҳуқуқий нуқтаи назардан тўғри. Бу квота Сенатга ўтказилади ва 9 депутатдан 5 нафарга қисқартирилади. Шунга кўра, парламентдаги депутатлик ўринларининг умумий сони камаяди», — деган у.

Аввалроқ Қозоғистонда ҳокимлар фаолиятига оид қонун қабул қилинганди. Шунингдек, Қозоғистон Россия ва Украина бўйича позициясини маълум қилинганди.