ЎзА берган хабарга кўра, Тошкент вилоятида кадастр ходимларидан бири пора билан ушланган.

Айтилишича, Давлат кадастрлари палатасининг Ўртачирчиқ тумани филиали ходими ва 42 ёшли битта шахс ўзаро тил бириктиришган. Улар деҳқончилик билан шуғулланмоқчи бўлган фуқарога тумандаги фермер хўжаликларидан бирига тегишли 17 гектар ер майдонини ижарага олиб бериш эвазига 15 минг АҚШ доллари талаб қилишган ҳамда сўралган пул маблағини олган вақтларида қўлга олинган.

Маълумот учун, ҳозирда ушбу ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ  Самарқандда бир гектар ерни 159 минг долларга сотмоқчи бўлган шахс ушланганди. Шунингдек, яна учта вилоятда ер майдонларини ноқонуний сотишга уринганлар қўлга олинганди.

Бундан ташқари, Андижон ва Самарқандда прокуратура ходимлари пора билан ушланганди.