Тошкент шаҳрида 1 та МЧЖ  қарийб 4 млрд  сўмлик табиий газдан ноқонуний фойдалангани аниқланди. Бу ҳақда Энергетика вазирлиги матбуот хизмати хабар берди.

Қайд этилишича, Тошкентда вазирлик ҳузуридаги «Ўзэнергоинспекция» томонидан Бош прокуратура ва «Ҳудудгазтаъминот» АЖ ходимлари билан биргаликда ўтказилган тадбирда Шайхонтоҳур туманидаги «Р.Т.» МЧЖ табиий газдан ноқонуний фойдаланиб келаётгани аниқланган.

Шунингдек, ушбу МЧЖга қарашли корхонанинг 2 та буғ қозони газ тармоғига ўзбошимчалик билан уланганлиги маълум бўлиб, натижада давлат манфаатларига 3 млрд 838 млн 950 сўм (5 млн 816 минг 592 метр куб) зарар етказилган.

Хабарда ушбу ҳажмдаги табиий газ 29 минг 82 та хонадоннинг бир ойлик истеъмолига тенг эканлиги айтилган.

Ҳозирда истеъмолчининг бугунги кун ҳолатида электр энергиясидан қарздорлиги сабаб электр тармоғидан ажратилган.

Аниқланган ҳолат юзасидан расмийлаштирилган ҳужжатлар белгиланган тартибда ҳуқуқни муҳофаза этувчи органларга тақдим қилинган.

Шунингдек, Тошкент вилоятида газ «заправка» ноқонуний фаолият юритгани бўйича маъсулларга жиноят иши қўзғатилганди.

Эслатиб ўтамиз, аввалроқ Ўзбекистонда газ, электр ва сувдан тижорат мақсадларида ноқонуний фойдаланиш ўғирлик деб белгиланганди.