Тошкентда метро поездларидан бирининг вагон чироғи ўчиб қолди. Ҳолат юзасидан «Тошкент метрополитени» ДУК расмий изоҳ берди.

Маълум қилинишича, бугун, 15 январ куни тахминан соат 11:51 лар атрофида Ўзбекистон йўлининг Дўстлик бекатидан ҳаракатланаётган 42-сонли ҳаракат таркибининг 4-вагонидаги электр билан таъминловчи ҳимоя автоматида техник носозлик ҳолати кузатилган ва бунинг натижасида вагоннинг асосий ёритиш чироқлари ўчиб қолган.

Ҳаракат таркиби сўнгги бекатга борганидан сўнг, машинист томонидан керакли чоралар кўрилган ва ёритиш тизими қайта тикланган. Корхона шунингдек, бу ҳолат поездлар ҳаракатига ҳеч қандай таъсир кўрсатмаганини таъкидлаган.

Аввалроқ, Тошкент ер усти метроси яқинидаги енгил конструкциядан қурилган дўконларда ёнғин содир бўлгани, ёнғин метро тизимига таъсир кўрсатмагани ҳақда хабар берилганди.