Тошкент шаҳар Шайхонтоҳур туманидаги «Баланд» масжидининг тарихий биноси янги қурилиш сабаб хавф остида қолгани ҳақида хабарлар тарқалди.

Тошкент шаҳар ҳокимлиги масжиднинг тарихий биноси сақланиб, янги қурилаётган бино ичида қолишини маълум қилган.

«Фотосуратлардан кўриниб турганидек, масжиднинг биноси ўзгармай қолади ва намоз вақтида кўпроқ муслимларни сиғдириш учун янги хона ва иншоотлар билан бойитилади. Шу тариқа, тарихий бино «консервация» қилинади, лекин шу билан бирга, ўзининг бирламчи вазифасини сақлаб қолади ва намоз ўқиш жойи сифатида хизмат қилишни давом эттиради. Ўз навқирон йилларида ичига кўпи билан 50 нафар инсонни сиғдира олган масжидда келгусида 450 нафардан ортиқ инсон намоз ўқиши мумкин бўлади. Шунингдек, унда таҳоратхоналар, ходимлар учун ошхона ва бошқа замонавий шароитлар яратилади»,- дейилган ҳокимлик хабарида.

Шунингдек, хабарда, бу каби ёндашув асосида тарихий ва замонавийлик уйғунлигини сақлашда ўзига хос ёндашув бўлгани ҳамда келгусида уни тарихий аҳамиятга эга бошқа диний объектларда ҳам қўллаш режалаштирилгани айтилган.

Аввалроқ, Сурхондарёда қарийб икки минг йиллик археологик ёдгорлик ҳудудида ҳожатхона қурилгани хабар қилинганди.