Бош прокуратура Департаментининг хабар беришича, Қашқадарё ва Сирдарё вилоятларида истеъмолга яроқсиз гўшт маҳсулотлари айланмасига чек қўйилди.

Ҳолатларнинг бирида Қашқадарё вилоятининг Кўкдала туманида «Қарши-Самарқанд-Тошкент» йўналиши бўйича ҳаракатланиб келаётган Ф.Э. бошқарувидаги Cobalt машинаси тўхтатилиб, кўздан кечирилганда, фуқаро Б.Х. жами 500 килограмм яроқсиз қорамол гўштини олиб кетаётгани аниқланган.

Иккинчи бир ҳолатда эса, Сирдарё вилоятининг Оқолтин туманида «Самарқанд-Тошкент» йўналиши бўйича Isuzu юк машинасини ҳайдаб бораётган Н.Р. жами 165 килограмм яроқсиз қорамол гўштини ортиб кетаётганди.

Ҳар иккала ҳолатда ҳам бу яроқсиз гўшт Тошкент шаҳрида сотиш учун автомобилларга ортилган.

Ушбу ҳолатлар юзасидан Жиноят кодексининг 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) билан жиноят ишлари қўзғатилиб, тергов ҳаракатлари олиб борилмоқда.

Аввалроқ, Самарқандда катта ҳажмдаги яроқсиз гўшт ушлаб қолиниб, Тошкентга олиб кетилаётган бир тонна сифатсиз гўшт савдосига чек қўйилганди.