АҚШнинг собиқ президенти Дональд Трамп федерал қидирув бюроси (ФҚБ) ходимлари унинг уйидаги тинтувда махфий тиббий ҳужжатларини олиб қўйганини айтди. Бу ҳақда «Independent» хабар берди.

Трампнинг Флоридадаги Мар-а-Лаго мулки август ойи бошида расмий материаллардан ноқонуний фойдаланиш, ўғирлаш ва йўқ қилиш ишининг бир қисми сифатида тинтув қилинган. Хавфсизлик кучлари уйдан юзга яқин турли даражадаги махфий ҳужжатларни қўлга киритган.

Дональд Трампнинг сўзларига кўра, ФҚБ унинг оиласи, жумладан, ўзи, рафиқаси, ўғлини барча шахсий буюмларини кўздан кечирган.

«ФҚБ уйимга бостириб кириб, нафақат менинг паспортларимни ўғирлади, балки суд маълумотларига кўра, менинг тўлиқ ва жуда шахсий тиббиёт ҳужжатларимни ҳам олиб қўйди», — деган у.

Аввалроқ Трамп уйидаги тинтувда топилган махфий ҳужжатларнинг тўлиқ рўйхати эълон қилинган. Улар орасида хорижий давлатнинг ядровий салоҳияти ҳақидаги ҳужжатлар ҳам топилган. Трамп суддан уйида топилган махфий ҳужжатларни текширмасликни сўраган, Байден эса собиқ президент уйидаги тинтувлар ҳақида гапирган.