Санитария-эпидемиологик осойишталик ва жамоат саломатлиги қўмитаси раиси биринчи ўринбосари Нурмат Отабеков иштирокида ўтказилган матбуот анжуманида Ўзбекистонда Гонконг гриппининг А (H3N2) тури аниқлангани маълум қилинди.

Гонконг гриппи ўткир респиратор касаллик бўлиб, касалликнинг бу штамми H3N2 деб аталади. Грипп оддий грипп вируси келтириб чиқарадиган аломатлардан фарқ қилмайди. Бу грипп 1960 йилда Гонконгда тарқалган бўлиб, ўша даврда H3N2 вирусидан мутация бўлиб шаклланган вирус сифатида бир неча Шарқ давлатларида муаммоли вазиятларни келтириб чиқарган.

«Ҳозир бу оддий, мавсумий грипп вируси ҳисобланади ва ишлаб чиқарилган вакциналарнинг барчаси ушбу вирусга нисбатан ишлайди. Демак, Ўзбекистон Республикасида ҳозиргача ишлатилган 2 миллион 200 минг доза вакцина бевосита мана шу штаммга қарши ишлайдиган вакцина ҳисобланади», дейди Нурмат Отабеков.

Эслатиб ўтамиз, аввалроқ Ўзбекистонда асосан ёш болалар ва ўсмирларда аниқланаётган «Кўкйўтал» касаллиги бўйича эпидемиологик вазият барқарор экани хабар қилинганди.