Дунё ахборот агентлиги хабар беришича, Ўзбекистоннинг Буюк Британиядаги янги фавқулодда ва мухтор элчиси этиб тайинланган Равшан Усмонов Лондонга етиб келган.

Равшан Усмонов 2019 йилдан буён Ўзбекистоннинг Буюк Британиядаги элчиси лавозимида ишлаб келган Саид Рустамов ўрнини эгаллаган.

Усмонов 2018 йилдан шу вақтгача Ўзбекистоннинг Малайзиядаги элчиси бўлиб фаолият олиб борган. 45 ёшли элчи Бирмингем университети (Буюк Британия), Ўзбекистон Ташқи ишлар вазирлиги қошидаги Жаҳон иқтисодиёти ва дипломатия университети ва Тошкент давлат юридик институти (ҳозирги университет) битирувчиси ҳисобланади.

У ташқи сиёсат соҳасида 2000 йилдан иш бошлаган. Дастлаб марказий аппаратда ва Ўзбекистоннинг Испаниядаги элчихонасида турли лавозимларда ишлаган. Кейин у Ташқи ишлар вазирлигининг Европа давлатлари ва НАТО билан ҳамкорлик бўйича дирекциясини бошқарган. Франция, шу билан бирга ўриндошлик асосида Италия ва Португалияда ҳам элчи бўлган.

Аввалроқ, Ўмон ва Чехиянинг Ўзбекистондаги янги элчилари тайинланганди.