Шу йилнинг 16-20 октябр кунлари Самарқанд шаҳрида БМТ Бутунжаҳон туризм ташкилоти Бош Ассамблеясининг юбилей 25-сессияси бўлиб ўтганди.

Ушбу сессиядан ўрин олган Глобал инвестиция форуми доирасида UNWTO Бош котиби Зураб Пололикашвили Экология вазири Азиз Абдуҳакимовга Tourism doing business. Investing in Uzbekistan китобини топширди.

Ушбу қўлланмани қабул қилиб олгач, вазир нутқ сўзлаган.

«Президент Мирзиёев туризмни миллий иқтисодиётнинг стратегик тармоғи сифатида белгилаб берди. Туризм соҳасига инвестицияларни кенг жалб этишни таъминлаш мақсадида хусусий секторнинг меҳмонхоналар қурилиши ва бошқа инфратузилма лойиҳаларига сармоя киритишини рағбатлантириш бўйича қатор чора-тадбирлар амалга оширилди. «Ипак йўли» сайёҳлик бренди, солиқ имтиёзлари ва кенг қамровли ислоҳотлар Ўзбекистонни жозибадор туризм инвестиция лойиҳасига айлантириши шубҳасиз. Халқаро бизнес ҳамкорлар ва инвестицияларни жалб этишда сезиларли натижаларга эришиш Invest in Uzbekistan брендининг ўзига хос белгисига айланди» деган Азиз Абдуҳакимов.

Шунингдек, фаолиятини давом эттириш учун 3 марта сайланиш ҳуқуқини қўлга киритган UNWTO Бош котиби З.Пололикашвили қўлланмада Ўзбекистоннинг улкан сармоявий салоҳияти қайд этилганини таъкидлаган.

«Қўлланма Бутунжаҳон туризм ташкилоти томонидан Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги ҳамда Туризм қўмитаси билан яқин ҳамкорликда тайёрланди. Нашр Ўзбекистоннинг улкан, лекин кўпинча фойдаланилмаётган сайёҳлик салоҳиятини кўрсатиб беради» деган Бош котиб.

Тадбирда инвестиция қўлланмасини тақдим этган UNWTO ижрочи директори Наталя Баёна эса Ўзбекистонда инвестиция имкониятлари учун қулай муҳит мавжудлигини айтиб ўтган.

«Ўзининг бой маданий мероси билан ажралиб турадиган Ўзбекистон қисқа вақт ичида туризмнинг асосий йўналишига айланиб бормоқда. Қўлланмада Ўзбекистон туризм секторининг сармоявий ландшафтини тубдан англаш учун асосий самарадорлик кўрсаткичлари, инвестиция тенденциялари ва сиёсат динамикаси таҳлил қилинган» деган у.

Туризм қўмитаси раиси Умид Шадиев эса Ўзбекистоннинг туризм соҳаси учун инвестиция мақсади 3 миллиард долларни ташкил этишини, яқин йилларда учтадан ортиқ миллиард долларлик меҳмонхоналар қурилишини айтиб ўтган.

«Туризм соҳаси учун инвестиция мақсадимиз 3 миллиард долларни ташкил этади. Глобал миқёсда гапирадиган бўлсак, бу унчалик катта маблағ эмас. Ўтган ой Лондонда очилган «The Peninsula» меҳмонхонаси дунёдаги биринчи миллиард долларлик меҳмонхона лойиҳаси эканлигини тушунаман ва сизни ишонтириб айтаманки, биз яқин йилларда учтадан ортиқ мана шундай меҳмонхоналар қуришни режалаштирмоқдамиз» деган қўмита раиси.

Маълумот учун, «Investing in Uzbekistan» сармоядорлар, сиёсатчилар ва манфаатдор томонлар учун мўлжалланган кенг қамровли манбадир.