АҚШ Европа Иттифоқига аъзо мамлакатлардан Ўзбекистон ва Тожикистондан келаётган саёҳатчиларга нисбатан кескин чоралар кўришни талаб қилмоқда. Бу ҳақда Bloomberg хабар берди.

Қайд этилишича, Байден маъмуриятининг бундай талабни илгари суришдан мақсади АҚШга эҳтимолий террорчиларнинг кириб бориши олдини олиш экани таъкидланган.

АҚШга Марказий Осиёнинг айрим давлатларидан бораётган шахсларга нисбатан виза талабларининг оширилиши бўйича ҳаракатлар 2023 йилнинг август ойида бир гуруҳ муҳожирлар ИШИДга алоқадор шахслар ёрдамида АҚШга ноқонуний киришга уринганидан сўнг кун тартибига қўйилган. Ушбу воқеа Европадаги аэропортлар орқали транзит ўтаётган йўловчилар охир-оқибат АҚШга ноқонунуний кириш учун уриниши билан боғлиқ хавотирларни келтириб чиқармоқда.

Таъкидланишича, АҚШ расмийлари Европа Иттифоқидан Ўзбекистон ва Тожикистондан борган муҳожирлардан транзит визаларини талаб қилишни сўраган.

Эслатиб ўтамиз, аввалроқ АҚШ Ўзбекистондан виза учун берилган аризаларнинг 47 фоизини рад этгани маълум бўлганди. Шунингдек, Тошкент вилоятида 30 минг доллар эвазига АҚШга виза тайёрлаб беришни ваъда қилган шахс ушланган.