Тошкент вилояти Зангиота туманида жойлашган «Бек Барака» бозори директори ўринбосари ДХХ ходимлари томонидан қўлга олинди. УзА берган хабарга кўра, у бозор балансидаги янги типда қурилган енгил конструкцияли дўконни сотмоқчи бўлган.

Директор ўринбосари ўзининг юқори лавозимда ишлайдиган танишлари орқали тадбиркорлик билан шуғулланмоқчи бўлган фуқарога дўконни олиб бериш эвазига 20 минг доллар олаётган вақтида ушланган.

Эслатиб ўтамиз, аввалроқ Тошкент шаҳри Сергели туманида танишлари орқали учта хонадон олиб бермоқчи бўлган сохта маҳалла раиси қўлга олинганди. Шунингдек, Бухорода танишлари орқали 5,5 сотих ерни беш минг доллар эвазига олиб беришни ваъда қилган шахс ушланган.