Давлат хавфсизлик хизматининг хабар беришича, Андижон вилояти Хўжаобод туман прокуратураси терговчиси гумонланувчидан унга нисбатан қамоққа олиш тарзидаги эҳтиёт чорасини қўлламаслик ва тергов ҳаракатлари давомида енгиллик яратиб бериш эвазига 5 минг АҚШ доллари талаб қилган.

Терговчи сўралган пул маблағини умумий овқатланиш масканида олган вақтида ашёвий далиллар билан ушланган. Тергов жараёнида эса терговчига ушбу пулларни олиш бўйича кўрсатмани туман прокурори ўринбосари берганлиги исботланиб, у ҳам қамоққа олинган.

Самарқанд вилоятида кузатилган ҳолатда эса, вилоятнинг Пастдарғом тумани прокурори ёрдамчиси айбланувчи сифатида кўрилаётган фуқарога нисбатан суд жараёнида енгиллик қилиш ва суд идораларида ишловчи танишлари орқали қамоқдан чиқариш эвазига, унинг қариндошларидан 3 минг АҚШ доллари талаб қилган.

Прокурор ёрдамчиси сўралган пул маблағидан 2500 АҚШ долларини олган вақтида ашёвий далиллар билан ушланган.

Ушбу ҳолатлар юзасидан мансабдор шахсларга нисбатан ҳар иккала вилоят прокуратураси томонидан Жиноят Кодексининг 168- ва 211-моддалари билан жиноят иши қўзғатилиб, қамоққа олиш тарзидаги эҳтиёт чораси қўлланилган.

Эслатиб ўтамиз, аввалроқ Бухорода пора эвазига ишга киритиб қўйишни ваъда қилган, Қашқадарёда ўқишга киритиб қўймоқчи бўлган ҳамда Фарғонада пора эвазига «права» олиб беришни ваъда қилган шахслар ушланганди.