Исроилнинг Беэр-Шеве шаҳрида содир этилган теракт оқибатида тўрт киши ҳалок бўлди. Бу ҳақда «Aljazeera» хабар берди.

Маълум қилинишича, теракт Ҳура қишлоғида яшовчи аввалроқ ИШИДга аъзоликда айбланиб, қамоқ жазосини ўтаган эркак томонидан содир этилган. 22 март куни соат 16:00 да Дерех Хеврондаги BIG савдо мажмуасида пичоқ билан қуролланган шахс ёқилғи қуйиш шохобчаси ходимига ҳужум қилган. Аёл оғир яраланган ва ҳушини йўқотган, кейинроқ шифокорлар унинг ўлимини қайд этган.

Шундан сўнг эркак машинада ёқилғи қуйиш шохобчасини тарк этиб, йўлда кетаётган велосипедчини уриб юборган. Машинадан тушиб One савдо марказига киган ва у ерда ҳам бир неча кишини жароҳатлаган. Ҳужум қурбонларининг уч нафари оғир аҳволда шифохонага ётқизилган. Бироқ кўрсатилган ёрдамга қарамай жабрланувчилар вафот этган. Ҳозирда яна икки аёлнинг аҳволи оғир.

Таъкидланишича, тўппонча билан қуролланган номаълум шахс террорчига қарата ўқ узган ва уни зарарсизлантирган. Тез орада полиция воқеа жойига етиб борган. Интернетда босқинчи савдо маркази яқинидаги йўл ўртасида пичоқ кўтараётгани акс этган видео тарқалган. Унинг атрофига тўпланган одамлар эркакдан пичоқни ташлашини сўраган. Оқибатда эркак уларга қулоқ солмагани учун қуролланганлардан бири томонидан ўқ отиб ўлдирилган.

Аввалроқ Ироқда касалхона ёнида теракт содир бўлганди. Шунингдек, Қирғизистонда 5 та мактабда теракт содир этмоқчи бўлган 6-синф ўқувчиси ушланганди.