Латвия парламенти Украина аҳолисини қўллаб-қувватлаш тўғрисидаги қонунга ўзгартиришлар киритишни маъқуллади. Унга кўра, давлатга тегишли транспорт воситаларини беғараз мақсадда Украина ҳукуматига топшириш мумкин бўлади, деб ёзади Delfi.

«Биз маст ҳайдовчиларнинг транспорт воситаларини мусодара қилишимиз, уларни сотиб юборишимиз, қайта ишлашга ёки эҳтиёт қисмларга ажратиб ташлашга бериб юборишимиз мумкин, аммо ҳозирги шароитда улар Украина халқи учун фойда келтиради деб ўйлаймиз», — дейди парламентнинг мудофаа бўйича комиссияси раиси Раймонд Бергманис.

Мусодара қилинган автомобилларни Украина армиясига топшириш бўйича қарор ҳар сафар Латвия ҳукумати томонидан қабул қилинади. Транспорт воситалари Украина ҳукумати билан ҳамкорлик қиладиган ташкилотга берилади ва у тегишли ёрдам сўровларини олади.

Маст ҳайдовчилардан мусодара қилинган автомобилларни Украинага бериш ташаббусини Латвия молия вазири Арвилс Ашерандес илгари сурганди. Уни мамлакат парламентидаги ҳукмрон коалиция қўллаб-қувватлаган.

Декабрь ойининг ўзида Оқ уй томонидан Украинага 275 миллион долларлик ҳарбий ёрдам пакети эълон қилинганди. Ноябрь ойида Жо Байден Конгрессдан Украинани қўллаб-қувватлаш учун 37,7 миллиард доллар сўраган. Ноябрь ойида шунингдек, 400 миллион долларлик ҳарбий ёрдам пакети эълон қилинганди. Ҳарбий ёрдам таркибидан Avenger ҳаво ҳужумидан мудофаа тизимлари ва Stinger ракеталари, шунингдек, Hawk мудофаа тизимлари учун ракеталар ўрин олган.

Октябрь ойида Жо Байден яна 725 миллион долларлик ҳарбий ёрдам эълон қилган бўлиб, ёрдамдан HIMARS учун ўқ дорилар, 23 минг артиллерия снаряди ўрин олганди. Сентябрь ойи охирида АҚШ Сенати Украина учун қўшимча 12,4 миллиард долларлик ёрдам лойиҳасини маъқуллаганди. Сентябрь ойида шунингдек, Украинага қўшимча 1,1 миллиард долларлик ҳарбий ёрдам пакети тайёрланаётгани хабар қилинган. 2022 йилнинг Ноябрь ойига келиб, АҚШ Украинага жами 20 миллиард долларга яқин ҳарбий ёрдам жўнатгани маълум бўлган.