Олимлар Ернинг ўз ўқи атрофида айланиш тезлиги кескин ошганини аниқлади. Бу ҳақда «TimeAndDate» хабар берди.

Маълум қилинишича, 29 июнь куни Ер айланиш тезлиги бўйича рекорд ўрнатган — шу куни сайёра ўз ўқи атрофида одатдагидан 1,59 миллисекундга тезроқ айланган.

Қайд этилишича, айни пайтда олимлар сайёранинг айланиш тезлигига нима таъсир қилганини аниқ билмайди. Уларнинг фикрича, тезликнинг ўзгариши сайёрадаги барча навигация тизимлари, шунингдек, компьютерлар, смартфонлар ва алоқа тизимларининг ишлашига салбий таъсир кўрсатади.

Маълумотларга кўра, сайёра тезлиги 1973 йилдан бери ўлчаб келинади, олимлар бу ишни атом соатлари ёрдамида амалга оширади ва шу тариқа Ернинг ўз ўқи атрофида айланишини якунлаш учун қанча вақт кераклигини аниқлайди.

Аввалроқ Даниянинг Копенгаген университети олимлари Ер атмосферасида юқори реактив кимёвий модданинг янги турини аниқлаганди. Шунингдек, британиялик астрофизик Аластер Ганн агар Ер тескари йўналишда айлана бошласа, ним юз бериши мумкинлигини айтганди.