Ижтимоий тармоқларда Қорақалпоғистон Республикаси Эллкқалъа туманида 13 яшар қиз қўшниси томонидан қўрқитилиб, икки йилдан буён зўрлаб келингани айтилган видеомурожаат тарқалди. Республика прокуратураси ҳолат юзасидан муносабат билдирди.

Маълум қилинишича, 2023 йилнинг 30 август куни Элликқалъа туманида яшовчи фуқаро М.З. Ички ишлар бошқармасига мурожаат қилиб, 2010 йилда туғилган, вояга етмаган набираси Т.С.ни ўз қўшниси, фуқаро З.Ш. қўрқитиш ва зўрлик ишлатиш орқали номусига теккани сабабли қонуний чора кўришни сўраган.

Мазкур ҳолат республика прокурори томонидан ўрганилиб, суд-тиббиёт экспертизасининг хулосаси ҳамда терговга қадар текширувда тўпланган иш ҳужжатлари инобатга олиниб, гумонланувчи З.Ш. га нисбатан жиноят иши қўзғатилган. Гумонланувчига Жиноят кодексининг 118-моддаси (номусга тегиш) 4-қисми, 119-моддаси (жинсий эҳтиёжни зўрлик ишлатиб, ғайритабиий усулда қондириш) 4-қисми билан жиноят иши қўзғатилган ва Жиноят-процессуал кодексининг 221-моддаси тартибида ушланган.

Тергов Қорақалпоғистон Республикаси прокурори томонидан назоратга олинган.

Эслатиб ўтамиз, аввалроқ Фарғонада 31 ёшли аёл тўрт нафар эркак томонидан зўрланган эди. Шунингдек, Самарқандда 19 ёшли қиз ҳамкасби томонидан зўрланган.