Ўзбекистоннинг халқаро захиралари қарийб 2 млрд долларга камайди
Мазкур ўзгариш олтин нархининг тушиши, тижорат банкларининг Марказий банкдаги ҳисобварақларида қолдиқ миқдорининг камайиши билан изоҳланган
Ўзбекистоннинг халқаро захиралари сезиларли даражада камайиб, 2023 йил 1 март ҳолатига кўра, 33,9 миллиард долларни ташкил этди. Бу кўрсаткич 2023 йилнинг 1 феврал ойи билан солиштирилганда 1,8 миллиард долларга камайган. Бу ҳақда Марказий банк хабар берди.
Ҳисоботда келтирилишича, 2023 йил 1 март ҳолатига кўра, олтиннинг физик ҳажми 12,4 миллион троя унциядан 12,6 миллион трояга ошган бўлса, қиймати 23 556,4 миллион доллардан 22 839,8 миллион долларга пасайган. Бундан ташқари, захира активлари таркибидаги хорижий валюта миқдори феврал ойида 11 314,1 миллион долларни ташкил қилган бўлса, 1 март ҳолатига кўра, бу кўрсаткич 1243,0 миллион долларга камайиб, 10 071,1 долларни ташкил қилмоқда.
Мавзуга доир: Ўзбекистоннинг олтин-валюта захиралари ҳажми ошди
Ўзбекистон ялпи халқаро захиралари 2023 йил бошидан 1,8 миллиард долларга ёки 5,0 фоизга камайди. Мазкур ўзгариш олтин нархининг йил бошидаги 1812,35 доллардан 1810,2 долларгача тушиши (-27,4 млн. доллар), тижорат банкларининг Марказий банкдаги ҳисобварақларида қолдиқ миқдорининг камайиши (-251 млн. доллар) ҳамда Марказий банк томонидан амалга оширилган валюта интервенциялари билан изоҳланади.
Мавзуга доир: Ўзбекистон олтин захираларини оширди, аммо Қозоғистон Марказий Осиёда етакчи бўлиб қолмоқда.
Аввалроқ Ўзбекистон олтин захираларининг ўсиши бўйича дунёда бешинчи ўрин эгаллагани, Ўзбекистон энг кўп олтин сотувчилардан бирига айлангани, Ўзбекистон олтин-валюта захиралари ҳажми 33,4 млрд долларга етгани ҳамда Ўзбекистон тоғларидаги 1 тн тупроқда қанча олтин борлиги ҳақида хабар берилганди.
