Қашқадарё вилоятида 14 ёшли қиз она-онаси томонидан аёвсиз калтаклангани тасвирлаган видео ижтимоий тармоқда тарқалди. Вилоят ИИБ мазкур ҳолат бўйича терговга қадар текширув ишлари олиб борилаётганини маълум қилди.

Қайд этилишича, 2023 йилнинг 16-апрел куни тахминан соат 11:30 ларда Қашқадарё вилояти Косон тумани «Қорабайир» маҳалласида яшовчи 2009 йилда туғилган Х.Г. онаси 1982 йилда туғилган М.М. ҳамда отаси 1978 йилда туғилган Т.Р. томонидан калтакланган.

Мазкур ҳолат вояга етмаган қизнинг амакиси томонидан видеотасвирга олиниб, ички ишлар органларига хабар берилган.

«Ҳозирда воқеа иштирокчиларининг барчаси аниқланиб, терговга қадар текширув ишлари олиб борилмоқда. Вояга етмаган қизнинг отаси Т.Р. руҳий касалликлар диспансерига текшириш учун юборилган. Жабрланувчи Х.Г.га нисбатан етказилган тан жароҳатларини аниқлаш учун суд-тиббий экспертизаси тайинланган», дейилади хабарда.

Аввалроқ Сурхондарёдаги 31-мактабнинг директор хонасида ўтказилган йиғилишда 34 ёшли эркак (ўқитувчи) икки нафар аёл ўқитувчи билан жанжаллашиб, уларни калтаклагани ҳақида хабар берилганди.

Аввалроқ бола ҳуқуқлари бўйича вакил Алия Юнусова Самарқандда фарзандини калтаклаган аёл иши юзасидан муносабат билдириб, аёлни оналик ҳуқуқидан маҳрум қилиш таклифини берганди. Сентябрь охирларида жиноят ишлари бўйича Пайариқ тумани суди биносида икки ёшли фарзандини калтаклаган аёлга ҳукм ўқилганди.