Қирғизистонда вируслар келтириб чиқарадиган касалликлар орасида чўчқа гриппининг улуши 96 фоизга етди. Бу ҳақда мамлакат Соғлиқни сақлаш вазирлиги касалликларнинг олдини олиш ва давлат санитария-эпидемиология назорати департаменти директори Султон Абдуқодировга таяниб, Kaktus media хабар берди.

Нашр мухбири томонидан вирус ҳали ҳам қўрқинчли ёки йўқлиги қабилида сўралган саволга департамент директори «Ҳа, қўшни мамлакатларда кунлик ўсиш ва касалланишни ҳисобга олган ҳолда», — дея жавоб берган.

Унинг айтишича, кўп йиллик динамикаларга кўра, грипп билан касалланишнинг энг юқори даражаси январь ойининг ўрталаридан охиригача давом этиши мумкин. Аммо вируснинг кучайишига қараб бу яна ҳам эртароқ содир бўлиши мумкинлиги маълум қилинган.

Абдуқодировдан касаллик бўйича келгуси кутилмалар сўралганда, башорат қилишга ҳали эрта эканлигини айтган.

У шу муносабат билан одамлардан гриппга қарши эмланишни сўраган.

Эслатиб ўтамиз, аввалроқ Қирғизистонда чўчқа гриппи тарқалиши тезлашгани ҳақида хабар берилганди. Бунинг ортидан мамлакатдаги 500 дан ортиқ мактаблар карантинга ёпилган. Шунингдек, декабрь ойининг бошларида Россияда ҳам чўчқа гриппи тарқала бошлаганди.