Россия Федерал хавфсизлик хизмати Керч бўғози орқали ўтувчи Қрим кўпригининг портлатилиши бўйича ишда гумон қилинган беш нафар шахс ҳибсга олинганини эълон қилди. Бу ҳақда Deutsche Welle хабар берди.

«Айни пайтда жиноят иши доирасида жиноятни тайёрлашда иштирок этган Россиянинг беш нафар фуқароси, Украина ва Арманистоннинг уч нафар фуқароси қўлга олинди», дейилади махсус хизмат хабарида. Портлаш ташкилотчилари сифатида Украина бош разведка бошқармаси ва унинг раҳбари Кирилл Буданов кўрсатилган.

Эслатиб ўтамиз, Россияни аннексия қилинган Қрим яримороли билан боғловчи 19 километрлик кўприкда 8 октябрь куни эрталаб портлаш содир бўлди. Қрим кўпригининг автомобиль қисмида юк машинаси портлатиб юборилгани, оқибатида темир йўл поездининг ёнилғи баклари ёниб кетгани айтилмоқда. Россия учун стратегик ва рамзий аҳамиятга эга объект жиддий зарар кўрди. Расмий маълумотларга кўра, тўрт киши ҳалок бўлган. Портлаш сабаб кўприк бўйлаб ҳаракат тўхтатилган.

Керч бўғозидан ўтган Қрим кўприги портлатилганидан икки кун ўтиб, 10 октябрь куни эса Украина шаҳарларига ракета зарбалари бошланди. Киев метроси ҳаракати тўхтатилган, барча станциялар бошпана вазифасини бажариши киришган.