Президент 17 октябр куни Пекин шаҳридага амалий ташрифи доирасида ўзига ажратилган қароргоҳда Amer International индустриал-саноат холдинги раиси Ван Венинни қабул қилди. Бу ҳақда Президент матбуот хизмати хабар берди.

Учрашувда мисни чуқур қайта ишлаш ва ундан юқори қўшилган қийматли инновацион ва харидоргир маҳсулотлар, шу жумладан, электротехника, электромобиллар учун аккумулатор батареялари, микроэлектроника ва яримўтказгичлар ишлаб чиқариш бўйича истиқболли лойиҳалар муҳокама қилинган.

Ван Венин мамлакатда олиб борилаётган ислоҳотлар Хитой компанияси учун қулай шароит яратаётганини таъкидлаб, Ўзбекистонга Марказий Осиё минтақасидаги бизнесининг бош йўналиши сифатида қараётганини айтиб ўтган.

Маълумот учун, Amer International компанияси Хитойнинг етакчи конгломератларидан бири бўлиб, юксак технологиялар, электроника, яримўтказгичлар саноати, кончилик ва қайта ишлаш тармоқларидаги лойиҳалар билан шуғулланади. Компания Fortuna 500 глобал рейтингига кирган. Хитойда ва унинг ташқарисида умумий қиймати 60 миллиард доллардан зиёд бўлган лойиҳаларни амалга оширмоқда.

Учрашув якунида, компания мамлакатда минтақавий офисини очиши ҳамда қўшма инновацион лойиҳаларни тезлаштириш бўйича «йўл харитаси»ни қабул қилиш юзасидан келишувга эришилган.

Эслатиб ўтамиз, аввалроқ, Шавкат Мирзиёев ва унинг рафиқаси Хитойга боргани хабар қилинганди.