12:25 | 10.10.23 573
Тошкентдаги уйларнинг тўртдан бир қисмида 6 ва ундан кўп одам яшайди — Статистика агентлиги
Пойтахтдаги уй хўжаликларининг энг катта қисмида 6 ва ундан ортиқ одам яшаши маълум бўлди.
Тошкент шаҳридаги уй хўжаликларининг тўртдан бир қисмида 6 ва ундан ортиқ одам яшайди. Бу ҳақда Статистика агентлиги матбуот хизмати хабар берди.
Қайд этилишича, пойтахтдаги уй хўжаликларининг 25,9 фоизида 6 ва ундан ортиқ одам истиқомат қилади. Шунингдек, бир кишилик уй хўжаликлари – 10,6 фоиз, икки кишилик – 14,8 фоиз, уч кишилик – 14,8 фоиз, тўрт кишилик – 18,9 фоиз, беш кишилик хўжаликлар эса 15,1 фоизни ташкил қилади.
Эслатиб ўтамиз, 2023 йилнинг феврал ойида Тошкентдаги квартиралар нархи бўйича статистика эълон қилинганди. Шунингдек, шаҳарда ижара нархи 2022 йилда қарийб 60 фоизга ошгани очиқланган.
