Эронда Қатарда бўлиб ўтаётган жаҳон чемпионати гуруҳ босқич 3-тури доирасидаги АҚШга қарши учрашувда мамлакат миллий терма жамоасининг мағлубиятини нишонлаган эронлик мухлис полиция томонидан отиб ўлдирилди. Бу ҳақда The Guardian хабар берди.

Қайд этилишича, 27 ёшли Меҳран Самак Каспий денгизи соҳилидаги Бандар Анзалий шаҳрида, Теҳрон шимоли-ғарбида терма жамоа мағлуб бўлгач, автомобиль сигналини чалганидан сўнг отиб ўлдирилган.

Ослода жойлашган Эрон Инсон Ҳуқуқлари (IHR) гуруҳи Самак «миллий терма жамоанинг АҚШга қарши мағлубиятидан кейин хавфсизлик кучлари томонидан тўғридан-тўғри нишонга олинган ва бошига ўқ узилган», — деб таъкидламоқда.

Ушбу воқеа сентябрь ойида 22 ёшли курд аёл Маҳса Аминининг полиция ҳибсхонасидаги ўлими сабаб бўлиб ўтган норозилик намойишлари ортидан Эрондаги зўравонлик репрессиялари кучайиши фонида содир бўлди.

IHR маълумотларига кўра, Эрон хавфсизлик кучлари намойишларни бостиришда камида 448 кишини ўлдирган, улардан 60 нафари 18 ёшгача бўлган болалар ва 29 нафари аёллар.

Эрон терма жамоаси ярим ҳимоячиси, АҚШ термасида ўйнаган ва Бандар Анзалийдан бўлган Саид Иззатуллоҳий Самакни билишини маълум қилди ва уларнинг ёшлар футбол жамоасида бирга тушган суратини интернетга жойлаштирди.

«Кечаги аччиқ мағлубиятдан сўнг, сенинг ўлиминг ҳақидаги хабар юрагимга ўт қўйди», — деди Иззатуллоҳи Instagram саҳифасида Самакни «болаликдаги жамоадоши» деб таърифлаб.

У дўстининг ўлимига изоҳ бермаган, аммо: «Бир кун келиб ниқоблар олинади, ҳақиқат ошкор бўлади», — деб ёзган.

У «Бизнинг ёшларимиз бунга лойиқ эмас. Бизнинг халқимиз бунга лойиқ эмас», дея қўшимча қилган.

Натижадан норози бўлган Иззатуллоҳига финал ҳуштаги янграганидан кейин ҳам жамоадошлари, ҳам америкалик футболчилар тасалли беришган.

Ижтимоий тармоқларда сешанба кунги мағлубиятни кўплаб эронлик мухлислар олқишлаётгани ва пиротехника воситалари отаётгани акс этган видеолар жойланган.

Нью-Йоркда жойлашган Эрондаги Инсон ҳуқуқлари маркази (CHRI) ҳам Самакнинг мағлубиятни байрам қилаётган пайтида хавфсизлик кучлари томонидан ўлдирилганини хабар қилди. CHRI чоршанба куни Самакнинг Теҳрондаги дафн маросимидан олинган видеони эълон қилди, унда мотам тутаётганлар «диктаторга ўлим», деб бақираётгани акс этган. Эрон олий раҳбари Оятуллоҳ Ҳоманаийга қаратилган қўшиқ намойишларнинг асосий шиорларидан биридир.

Сешанба куни кечқурун сургундаги эронлик журналист Масиҳ Алинажод Twitter’да байрамлар акс этган видеоларни жойлаштирди ва шундай ёзди: «Эрон халқи футболга жуда иштиёқли мамлакат. Ҳозир улар Санандаж шаҳрида кўчаларга чиқиб, АҚШга қарши ўз терма жамоасининг мағлубиятини нишонламоқда». У, шунингдек, Маҳса Аминининг туғилган шаҳри Саққезда мушаклар отилаётгани акс этган видеони ҳам жойлаштирган.

Iran is a country where people are very passionate about football. Now they are out in the streets in the city of Sanandaj & celebrate the loss of their football team against US.
They don’t want the government use sport to normalize its murderous regime.pic.twitter.com/EMh8mREsQn pic.twitter.com/MqpxQZqT20

— Masih Alinejad 🏳️ (@AlinejadMasih) November 29, 2022

Маълумот учун, Эрон терма жамоаси АҚШга қарши принципиал ўйинда 2:0 ҳисобида мағлубиятга учраб, гуруҳда қолиб кетди. Бир тур аввал Уэльсга қарши ўйинда 2:0 ҳисобида қозонилган ғалабадан кейин форсларда плей-офф босқичига йўлланмани қўлга киритиш учун яхшигина имконият юзага келган эди.

Эслатиб ўтамиз, аввалроқ Қатардаги жаҳон чемпионатида мухлисларга салибчилар либосини кийиш тақиқланганди. Шунингдек, Саудия Арабистонида жаҳон чемпионатида Аргентина мағлуб этилгани шарафига 23 ноябрь дам олиш куни деб эълон қилинганди.