Автомобилларга қўйилган номлар қандай маъно англатади?

Bugun.uz Ўзбекистондаги автомобил саноати ҳақида маълумот беради

Ўзбекистонда автомобилга қизиқмаган, бир бора бўлса ҳам ҳайдаб кўрмаган инсон топилмаса керак. Халқимиз суювчи бу машиналар Ўзбекистонга илк бора Daewoo бренди остида кириб келган. Ўтган ўттиз йил мобайнида автомобил саноати ҳамда компанияда кўплаб ўзгаришлар кузатилди.

Bugun.uz ўз ўқувчиларига Ўзбекистонда автомобилсозликнинг қарор топиши ва бугунги кунгача босиб ўтган йўли ҳақида ҳикоя қилади.

Мундарижа:

1. Компания ташкил этилиши ва илк автомобиллар

2. Daewoo’нинг қулаши

3. UzAvto Motors

4. Компания ишлаб чиқарган автомобиллар рўйҳати

5. Автомобилларга қўйилган номлар қандай маъноларни ифодалайди?

Компания ташкил этилиши ва илк автомобиллар

Ўзбекистонда автомобил саноатини ташкил этиш ташаббуси биринчи президент Ислом Каримовнинг илк раҳбарлик йилларига тўгри келади. Шу мақсадда, 1992 йил «ЎзАвтосаноат» ҳамда Жанубий Кореянинг Daewoo компанияси ўртасида ташкил этилган компания, дастлаб Uz-DaewooAvto номи остида фаолият юритган.

Ислом Каримов Damas машинаси ролида
Фото: Ижтимоий тармоқ

1996 йилда компаниянинг Асакадаги янги заводи иш бошлади. Компания Uz-Daewoo бренди остида автомобиллар ишлаб чиқарган. Дастлаб барчамизга маълум Damas, Nexia ва Tico автомобиллари халққа тақдим қилинган. Ҳозиргача Nexia ва Damas машиналари янгиланган шаклда ишлаб чиқарилаётган бўлса, Tico машинаси 2003 йилда заводдан олиб ташланди.

Daewoo’нинг қулаши

2001 йил Daewoo компаниясида инқироз кузатилди. Бу даврда компания раҳбарияти ва мулкдорлари ўзгариши кузатилган. Натижада компания General Motors томонидан сотиб олиниб, GM Daewoo номи остида фаолиятини давом эттирди.

2008 йил GM Uzbekistan компанияси ташкил этилди. Шу йилдан эътиборан, ишлаб чиқарилаётган автомобиллар Chevrolet маркаси остида сотиладиган бўлди. GM Uzbekistan қўшма корхонаси акциялари икки ташкилотга: «ЎзАвтосаноат» ва General Motors’га тегишлидир.

GM Uzbekistan 2011 йилнинг биринчи ярмида 106 334 дона автомобил ишлаб чиқарган.

Компания номи ва мулкдорларнинг ўзгаришига қарамай, 2015 йилгача Uz-Daewoo маркали автомобиллар ишлаб чиқариш давом эттирилган. Шунингдек, бу даврда ишлаб чиқарилган автомобиллар ассортиментида ҳам ўзгаришлар кузатилиб, автомобил тури кўпайди.

UzAvto Motors

2019 йилда Ўзбекистон ҳукумати компанияни сотиб олиб, унинг номини UzAvto Motors деб ўзгартирди. 2020 йилда Equinox, TrailBlazer, Traverse ва Tahoe автомобиллари импорти йўлга қўйилди. Компания бу машиналарга маҳаллий бозорда ҳам талаблар кўпайса, маҳаллий мижозлар учун ҳам ишлаб чиқариш ниятида эканини айтган.

UzAvto 2020 йилда Ravon брендидан воз кечди. 2021 йилда эса, Россия бозори учун Chevrolet русумли автомобиллар ишлаб чиқариш режаси эълон қилинган. Бо Андерссон ўтган йилнинг августида компания бош ижрочи директори бўлди.

Украина уруши жаҳондаги кўплаб компаниялар қатори UzAvto Motors’га ҳам таъсир қилмай қолмади. Россия ва Беларусга қарши қўлланилган санкциялар сабаб бу икки давлат учун автомобил экспортига чекловлар ўрнатилди. Украина ҳудудида ҳарбий ҳаракатлар олиб борилаётгани сабаб бу давлатга ҳам экспорт тўхтатилган.

Компания ишлаб чиқарган автомобиллар рўйҳати

Ўттиз йилдан ошиқ давр мобайнида Ўзбекистонда турли автомобил моделлари ишлаб чиқарилди. Дастлабки вақтдан то бугунгача бўлган моделлар ҳам йўқ эмас (янгиланган версияларда тақдим этиб келинмоқда).

Қуйида компания ишлаб чиқарган автомобиллар рўйхати ва ишлаб чиқариш бошланган йилларни тақдим этамиз:

Daewoo Damas (1996)
Daewoo Labo (1996)
Daewoo Tico (1996) (ишлаб чиқариш тўхтатилган)
Daewoo Matiz (2001)
Daewoo Nexia (1996) (ишлаб чиқариш тўхтатилган)
Daewoo Lacetti (2003)
Chevrolet Captiva (2007) (ишлаб чиқариш тўхтатилган)
Chevrolet Epica (2007) (ишлаб чиқариш тўхтатилган)
Chevrolet Tacuma (2008) (ишлаб чиқариш тўхтатилган)
Chevrolet Spark (2010)
Chevrolet Malibu (2012) (ишлаб чиқариш тўхтатилган)
Chevrolet Cobalt (2013)
Chevrolet Orlando (2013) (ишлаб чиқариш тўхтатилган)
Daewoo Gentra (2013)
Chevrolet Nexia (2016)
Chevrolet Tracker (2018)
Chevrolet TrailBlazer (2018)
Chevrolet Equinox (2019)
Chevrolet Traverse (2019)

Автомобилларга қўйилган номлар қандай маъноларни ифодалайди?

Ўзбекистонда ишлаб чиқарилган автомобилларга қўйилган номлар ҳеч эътиборингизни тортганми? Баландпарвоз ва ўзга тилда бўлган бу номларнинг маъноларига қизиқиб кўрганмисиз?

Қуйида автомобилларга қўйилган номлар ҳамда уларнинг маъноларига ҳам тўхталиб ўтамиз.

1. Daewoo сўзи корейсчадан таржима қилинганда «бепоён коинот» маъносини англатади.

2. Nexia испанча сўз бўлиб, «ёрқин» деган маънони ифодалайди.

3. Damas қадимги юнон тилидан олинган бўлиб, «жиловловчи» деганидир.

4. Tico испанчадан таржима қилинса «кичик» маъносини ифодалайди.

5. Matiz испанчада «алвон ранг» дегани.

6. Lasetti лотинча «Lacertus», яъни «ёшликка хос» деб таржима қилинади.

7. Captiva инлиз тилидан олинган ва «маҳлиё» маъносига эга.

8. Тасума эса Бразилиядаги хурмо дарахтининг номи.

9. Spark сўзининг маъноси «учқун» сифатида таржима қилинади.

10. Malibu Калифорния штатида жойлашган шаҳардир.

11. Cobalt’нинг номи шу номдаги кимёвий элементдан олинган.