Хоразм вилояти Шовот тумани «Шовот» чегара божхона постида икки дона қадимий билагузукни яширинча олиб чиқишга уринган йўловчи тўхтатиб қолинди. Бу ҳақда Хоразм вилояти божхона бошқармаси ахборот хизмати маълум қилди.

Хабарга кўра, йўловчи 520 граммдан зиёд оғирликдаги билагузукларни қўл юки орасида чегара божхона постидан олиб чиқмоқчи бўлган.

Санъатшунослик экспертизаси хулосасига кўра, никел, мис, қалай ва кумуш аралашмасидан қўлда ясалган ушбу билагузуклар ХХ аср бошларига мансуб бўлиб, тарихий-бадиий қийматга эга маданий бойлик ҳисобланади.

Маълум қилинишича, Шовот туман судининг қарорига асосан қадимий ашёлар давлат эгалигига ўтказилган. Ҳозирда билагузуклар Хива «Ичан-қалъа» давлат музей қўриқхонасида сақланмоқда.

Эслатиб ўтамиз, аввалроқ Бухорода тарихий тангаларни хорижга олиб кетмоқчи бўлган шахс ушлаб қолингани, Тошкентда 300 га яқин қадимий танга олиб кетаётган шахс ушлангани ҳамда Навоийда маданий бойликларни четга олиб кетаётган икки фуқаро қўлга олингани ҳақида хабар берилганди.