Қозоғистон президенти Қосим-Жўмарт Тўқаев «Хабар» телеканалига берган интервьюсида икки муддатдан ортиқ президент сифатида сайланмаслиги, Конституция ўзгартирилмаслигини маълум қилди.

Маълум қилинишича, Тўқаев бир вақтнинг ўзида жамиятдаги сиёсий ўзгаришлар билан ҳам, иқтисодий ўзгаришлар билан ҳам шуғулланиш кераклигини қайд этган.

«Ҳар ҳолда бу менинг миссиям. Қачонгача Қозоғистон президенти бўлишимни билмайман, лекин Конституцияга кўра икки муддатдан кўп эмас. Президент курсисида қолиш учун қонунларни қайта ёзмайман. Конституцияга ўзгартириш киритиш бўлмайди», — деган у.

Шунингдек, у президент сифатидаги вазифаси бутун тизим ва иқтисодиётни ўзгартиришда ижобий натижаларга эришиш эканини айтган. Иқтисодиётни ислоҳ қилиб, сиёсатни кейинга қолдириш мумкин эмаслигини қўшимча қилган.

Шунингдек, президент Қозоғистонда парламент тизимини ислоҳ қилиш ҳақида жиддий ўйлаётганини айтган.

«Келажакда қандайдир воқеалар бўлишини кутаётгандек айтишим мумкинки, мамлакатимизда парламент тизимини ва албатта, партиявий тизимни ислоҳ қилиш ҳақида жиддий ўйлаяпман. Бу ҳақда давлат раҳбари сифатида 28 январь куни партия қурултойида айтган эдим. Мен барча ижтимоий-партиявий ва сиёсий тузилмалардан бироз устун туришим, турли ижтимоий-сиёсий кучларни бирлаштиришим учун ўзига хос магнит бўлиб хизмат қилишим керак. Уларнинг позициялари нуқтаи назаридан, бу давлатимиз манфаатларидан келиб чиқади», — деган у.

Аввалроқ Қозоғистон президенти Нурсултон Назарбоев ҳақида гапирганди. Шунингдек, у бизнесменлар билан учрашувда Ўзбекистондаги нефть-газ заводларини мисол қилиб кўрсатганди.