Тошкент метрополитени ахборот хизмати «Космонавтлар» метро бекати яқинида ёнғин чиққанига муносабат билдирган эди. ФВВ ҳолат юзасидан қўшимча маълумот берди.

«Ҳудудий электр тармоқлари» АЖ ёнғин оқибатида 35/10/6 кВли «Узбекистон» подстанциясидан чиқувчи кабель тармоғи шикастланганини маълум қилди.

Ёнғин келиб чиқишига «Ўзбекистон» подстанциясидан чиққан кабель тармоғи шикастланиши сабаб бўлгани маълум қилинди. Ёнғинни ўчириш учун 9 та ёнғин қутқарув экипажи жалб этилган. Воқеа жойига фавқулодда вазиятлар вазири ҳам етиб борган. Ёнғин 1 соатда бартараф этилган.

Ҳодиса оқибатида жабрланганлар йўқ, аммо Яккасарой туманининг Конституция ва Юнус Ражабий маҳаллалари ҳамда Миробод туманининг Абдулла Авлоний ва Ат-Термизий маҳаллаларидаги аҳоли истеъмолчилари электр энергиясидан узилган.

Шунингдек, ИИВ биноси ёнидан ўтган ерости кабеллари ёниши оқибатида Давлат хизматларида паспорт ва манзил билан боғлиқ хизматларни кўрсатишда узилишлар келиб чиққан.