Туркманистоннинг Аҳал вилоятида собиқ президент Гурбангули Бердимуҳамедов топшириғига кўра, очиқ ҳавода «Органик қовун етиштириш ва унинг экологияга қўшган ҳиссаси» мавзусида ўтказилган семинар Гиннес рекордлар китобига киритилди. Бу ҳақда «Хроника Туркменистана» хабар берди.

Маълум қилинишича, унда 500 нафар агроном иштирок этган. Туркманистон қишлоқ хўжалиги институти илмий-ишлаб чиқариш маркази илмий ходими семинар иштирокчиларига боғ ва узумзорларнинг янги шаҳар атрофидаги экологик вазиятга таъсири ҳақида маъруза ўқиган.

Сердар ва Гурбангули Бердимуҳамедовлар бу ерда аввалроқ экилган узумзорларни кўздан кечирган. «ТДХ» агентлигига кўра, Бердимуҳаммедов узум навларидан бирини «кяризек» деб атаган, чунки шу ердан худди шу номдаги қишлоқ бор. Маърузадан сўнг тадбирнинг барча иштирокчилари «қора майиз» навли узум кўчатини экишган.

Бу мамлакатнинг биринчи марта рекордлар китобидан жой олиши эмас. Аввалроқ Туркманистон 2019 йил 8 август куни Туркманбошида ўтказилган экология бўйича энг катта дарс учун Гиннеснинг рекордлар китобига киритилган. Ўша йили Ашхободдаги Олимпия шаҳарчасида бир чизиқ бўйлаб энг узун велопарад ташкил этилган. 2018 йилнинг 1 июнь куни Ашхобод стадионида велоспорт бўйича энг оммавий дарс бўлиб ўтган.

Эслатиб ўтамиз, аввалроқ Туркманистонда отлар ўртасида гўзаллик танлови ўтказилгани, Гурбагули Бердимуҳамедовнинг отига ҳайкал қўйилгани, туркманистонлик уруш қатнашчиларига 10 доллардан тарқатилгани хабар берилганди. Ушбу мамлакатда болаларга мобил телефондан фойданиш тақиқланганди. Туркманистон пойтахтини ҳукумат рухсатисиз тарк этишга рухсат берилганди. Шунингдек, Турканистондаги ўқитувчиларга президент сиёсатини қўллаб-қувватлаши мажбурий этиб белгиланганди.