АҚШ Россия Донецк ва Луганск халқ республикаларини, шунингдек, Херсон ва Запорожье вилоятларини ўз таркибига қўшиб олгани боис янги санкцияларни жорий этди. Санкцияга учраган фуқаролар ва компаниялар рўйхати АҚШ Молия вазирлиги сайтида эълон қилинган.

Ҳужжатга кўра, АҚШ санкциялари ўнлаб юридик ва жисмоий шахсларга тааллуқли. Хусусан, рўйхатга Россия Давлат думаси ва Федерация кенгашининг қатор аъзолари, шунингдек, Москва мэри Сергей Собянин, бош вазир Михаил Мишустин, Россия мудофаа вазири Сергей Шойгу киритилган.

Бундан ташқари, чекловлар «Радиоэлектрон кураш илмий-техник маркази» АЖ, «Модуль» ЁАЖ, «Новострим», «Радиоавионика» МЧЖ, «Светлогорскхимволокно» ОАЖ ҳамда бошқа корхоналар ва уларга боғлиқ фуқароларга қўлланилган.

Аввалроқ Байден ДХР, ЛХР, Херсон ва Запорожьедаги референдумлар сабаб Россияга санкциялар ваъда қилганди. Шунингдек, Украинада давом этаётган уруш фонида Европа Комиссияси 28 сентябрь куни Россияга қарши янги санкциялар, жумладан, нефть нархининг юқори чегарасини жорий этиш бўйича таклифларни эълон қилган. «Катта еттилик» давлатлари ҳам Кремль референдумлари ва сафарбарликни қоралаганди.