Шу йилнинг 25-27 декабр кунлари бўлиб ўтган оммабоп автомобиллар контрактацияси даврида UzAutoSavdo платформасидан фойдаланган ҳолда, жами 171 минг 200 дан ортиқ шартномалар муваффақиятли тузилди. Шу билан Chevrolet Cobalt, Damas вa Labo автомобилларининг 2024 йилдаги ички бозорга йўналтирилган ҳажми учун контрактация якунланди. Бу ҳақда компания ўзининг Telegram’даги расмий саҳифасида маълум қилди.

Автомобиллар учун онлайн шартнома бериш жараёнида UzAutoSavdo онлайн-савдо тизимида 7 000 та киберҳужум кузатилган. Умуман олганда, тизимда ушбу вақт оралиғида уч миллиондан ортиқ фаол сеанслар қайд этилган. Шу билан бирга, компаниянинг Cаll-маркази томонидан 3 000 дан ортиқ мурожаатлар қабул қилиниб, кўриб чиқилган.

Эслатиб ўтамиз, аввалроқ Cobalt, Damas ва Labo’га 22 декабрдан бошлаб онлайн контрактация очилиши хабар қилинганди. Шунингдек, UzAuto Motors қатор машиналарга имтиёзли кредит ажратиши мумкинлиги ҳақда Bugun.uz ўз манбасига таяниб, компания бу режани Ўзбекистондаги банклардан бири билан йўлга қўймоқчилиги ҳақда хабар берилганди. Бундан ташқари, UzAuto Motors агар харидор беш кун ичида автомобилини дилерлик марказидан олиб кетмаса, машина навбат тартиби асосида кейинги мижозга берилиши тўғрисида аҳолини огоҳлантирганди.