Украина узоқ масофага мўлжалланган ракеталарга муҳтож ва Ғарб ҳамкорларига бундай қуроллар мамлакат ташқарисидаги нишонларга қарши қўлланилмаслигига кафолат беришга тайёр. Бу ҳақда Украина ҳукумати ва Европа комиссиясининг қўшма йиғилишида мамлакат мудофаа вазири Алексей Резников маълум қилди.

«Агарда бизда 300 километр узоқликдаги нишонларга зарба бериш имконияти бўлганида Россия армияси мудофаани таъминлай олмай, мағлубиятга учраган бўларди. Украина сизнинг қуролларингиз Россия ҳудудига ҳужум уюштиришда ишлатилмаслиги борасида исталган кафолатни беришга тайёр. Украинанинг вақтинча босиб олинган ҳудудида етарлича нишонларимиз бор ва биз ҳамкорларимиз билан уларни мувофиқлаштиришга тайёрмиз», — дея вазирнинг сўзларини келтиради «Укринформ».

Резников Ғарб давлатларини Украинага имкон боричда тезроқ ракеталарга қарши мудофаа тизимларини ўрнатишда ёрдам беришга чақириб, Patriot ва SAMP/T, шунингдек, янги IRIS-T ва NASAMS кераклигини таъкидлаган. Украинага иттифоқчилари томонидан тақдим этилган энг узоқ масофага учувчи қурол бу — HIMARS реактив залп ўт очиш тизимларидир. Улар GMLRS снарядлари ёрдамида 80 километрга уча олади.

Аввалроқ АҚШ ҳукумати Украинага 2,2 миллиард долларлик янги ҳарбий ёрдам пакетини тайёрлаётгани маълум бўлганди. Унинг ичидан узоқ масофага мўлжалланган ракеталар ўрин олади. Boeing ва Saab Group компаниялари томонидан ишлаб чиқарилган GLSDB (Ground Launched Small Diameter Bomb) ракеталари ҳақида кетмоқда. Улар 150 километр узоқликка парвоз қила олади.

Эслатиб ўтамиз, АҚШ президенти Украинага 31 та Abrams танкларини етказиб беришини эълон қилганди. Кейинроқ Байден Украинага жўнатилиши айтилган 31 та Abrams M1A2 танклари камида 2023 йил охирларида Киевга етказиб берилишини айтганди. Байденнинг сўзларига кўра, ушбу танклар Украина Қуролли Кучларига «очиқ майдонда яхшироқ манёвр қилишига» ёрдам беради. АҚШ президенти, шунингдек, Германияга Киев учун Leopard танкларини беришга қарор қилгани учун миннатдорчилик билдирган. Унинг таъкидлашича, бу яна бир бор Украина иттифоқчиларининг бирдамлигини ҳамда Россиянинг уларни бўлиб юборишга бўлган уриниши фойдасиз эканини кўрсатган.