Хориж манбаларининг хабар беришича, Tesla ва SpaceX эгаси Илон Маск америкалик блогер Лекс Фридманнинг подкастига интервью бериш пайтида, Фридман унга Украина раҳбари Россия Федерацияси президенти билан музокаралар столига ўтириши керакми деган саволни берган. Тадбиркор эса бу саволга «ҳа» дея жавоб берган.

«Ҳа. Мен Украина президентига мамлакат ёшларини хандақларда, уруш окопларида ўлиш учун юбормасликни маслаҳат бераман. У Путин билан мулоқот қиладими ёки йўқми, аммо ёш авлодни «ўлимга юбориш» жуда катта хатодир» деган Илон Маск.

Тадбиркорнинг фикрича, ҳозир фронтдаги вазият Украина қуролли кучлари учун жуда ноқулай ва Киевнинг қарши ҳужумни давом эттириш қарори катта йўқотишларга олиб келиши мумкин. Ғарб эса Украина расмийларини Москва билан музокара столига ўтиришга мажбур қилиши керак.

Маълумот учун, Илон Маск 2022 йил октябр ойида аннексия қилинган Қрим Россия таркибида қоладиган «тинчлик режаси»ни таклиф қилган эди. Аммо, ўшанда расмий Киев унинг таклифларини танқид қилганди.

Эслатиб ўтамиз, аввалроқ Илон Маск Россия ва Украина ўртасида тинчликни ўрнатиш борасидаги таклифини илгари сурганди. Шунингдек, унинг бир кунда 16,1 миллиард доллар йўқотгани, Қозоғистондаги икки мингта мактабни Starlink интернет тармоғига уламоқчи эканлиги айтилганди. Бундан ташқари, бутун дунё учинчи жаҳон уруши томон кетаётганини таъкидлаганди.