Украина Қуролли Кучлари, эҳтимол, Россия армияси 2022 йил май ойидан бери босиб олишга уринаётган Бахмутнинг бир қисмидан қўшинларни назорат остида олиб чиқиш учун шароит яратмоқда. Бу ҳақда Америка урушни ўрганиш институти (ISW) экспертлари 3 март кунги ҳисоботида хабар берди.

Жума куни (1, 2) эълон қилинган кадрлар Украина Қуролли Кучлари Бахмут ҳудудида иккита муҳим кўприкни вайрон қилганини тасдиқлайди — бири шаҳар шимоли-шарқидаги Бахмутовка дарёсидан ўтган, иккинчиси Бахмут ғарбидаги Хромово қишлоғига олиб борувчи йўлда. Бу орқали Украина Қуролли Кучлари Бахмутнинг шарқий қисмида рус қўшинларининг олдинга силжишига халақит бериш ва уларнинг ғарбга потенциал чекиниш йўлларини чеклаш ҳисобини олаётганини кўрсатиши мумкин, дейди ISW таҳлилчилари.

Агар Украина ҳарбий қўмондонлиги Бахмутдан чекинишни зарур деб ҳисобласа, у ҳолда Шарқий Бахмутнинг ўта мураккаб секторларидан чекланган ва назорат остида олиб чиқилиши мумкин, дея хулоса қилади экспертлар.

Британия ҳарбий разведкаси ўз шарҳида Бахмутдаги иккита кўприкнинг вайрон бўлишига ҳам эътибор қаратади ва улардан бирини «ҳаёт учун зарур» деб атайди: у шаҳарни Часов Ярга сўнгги асосий таъминот йўли билан боғлади. Шу билан бирга, Буюк Британия Мудофаа вазирлиги Украина Қуролли Кучлари Бахмут шимолий чеккасини элита бўлинмалари билан мустаҳкамламоқда, улар Россиянинг уч томондан ҳужумлари учун «заиф» бўлиб қолган.

Украина Бош штабининг 4 март куни эрталабки ҳисоботида айтилишича, Россия ҳарбийлари Бахмутни қуршаб олишга бўлган уринишлардан воз кечмаяпти. Ўтган кун давомида Украина Қуролли Кучлари маълумотларига кўра, Бахмут йўналишида Россиянинг кўплаб ҳужумлари Бахмутнинг ўзида, шунингдек, Васюковка, Дубово-Василевка, Богдановка ва Ивановск аҳоли пунктларида қайтарилди.

Аввалроқ Украина президентининг иқтисодий масалалар бўйича маслаҳатчиси Александр Роднянский Украина ҳарбийлари Бахмутдан «стратегик чекиниш»ни амалга ошириши мумкинлигини айтганди.

Аввалроқ АҚШ президенти Жо Байден администрацияси Украина ҳукумати уруш траекториясини ўзгартиришнинг ҳал қилувчи вақти келгани ҳақида огоҳлантирганди. Оқ уй ходимларининг ҳисоблашича, Россия баҳорда ҳужумни бошлайди, Украина эса бой берилган ҳудудларни қайтариш учун контрҳужумга ўтиши мумкин. Кейинги ойлар кескин кечиши ҳақида Украина ҳукуматига январь ойида Киевга келган америкалик амалдорлар маълум қилганди.

Эслатиб ўтамиз, февраль бошларида АҚШ президенти Жо Байден январь ойида МРБ бошлиғи Уильям Бёрнсга Россия ва Украина тинчлик музокараларини ўтказишга қанчалик тайёрлигини баҳолашни топширгани маълум бўлганди. Шунингдек, Россия яқин 10 кун ичида Украинада кенг кўламли ҳужумни бошлаши мумкинлиги айтилган.